Vieiros

"Que a información e consellos sanitarios cheguen ao maior número de persoas, que procure a máxima divulgación e que os cidadáns poidan recibir estas indicacións na súa lingua de elección". Este é o obxectivo dunha suxestión que o Valedor do Pobo, Benigno López, enviou á Consellaría de Sanidade, na que insta a este departamento a "estudar a conveniencia de realizar todas as campañas informativas en ambas linguas oficiais". Así, explica, "conseguiríanse os fins e obxectivos regulados tanto na Constitución como no Estatuto de Autonomía e na Lei de Normalización Lingüística".

Este requirimento prodúcese logo de que o sindicato de enfermaría SATSE enviase unha reclamación ao Valedor sobre uns folletos, en concreto, referidos aos perigos do monóxido de carbono. O devandito tríptico informaba sobre como previr a intoxicación, un problema que provoca, segundo o colectivo profesional, máis de 100 urxencias anuais. Ao parecer, esta documentación estaba exclusivamente en galego e o sindicato denunciaba "a incongruencia de ofrecer información preventiva unicamente nesta lingua, cando non toda a poboación da Comunidade Autónoma é natural, coñece o idioma cooficial nin ten a obriga legal de coñecelo, un feito que se agrava por tratarse dun asunto que compromete a saúde".

Agora, a Consellaría ten un mes de prazo para darlle unha resposta á suxestión do Valedor, quen xa solicitou informes tanto a Sanidade como a Política Lingüística sobre este particular.

Lenta tramitación das queixas sobre o galego

A nova chega poucas semanas despois de que a Mesa pola Normalización Lingüística acusase o Valedor de silenciar os casos de discriminación do galego. O presidente da Mesa, Carlos Callón, ten criticado que a institución incluíse episodios diversos, acontecidos a diferentes persoas, "nun único expediente". Así, Callón insiste en que, malia que a institución rexistrou un total de 150 queixas por vulneración de dereitos lingüísticos, "á hora de subliñar, López centrou a súa atención en temas que rexistraron menos reclamacións, como é o do incumprimento da Lei de Dependencia".Ademais, a Mesa tamén lle reprocha a Benigno López que, presuntamente, "tenta complicar burocraticamente todas as queixas por vulneración do dereito a usar o galego" e mesmo de "non tramitalas".