Vieiros

A ACB confirmou ao CAB Obradoiro na máxima competición estatal do baloncesto, para a tempada 2009-2010, despois de analizar a documentación presentada polo club e coñecer o informe dos auditores. Agora só falta que a Asemblea Xeral da ACB confirme o vindeiro 10 de xullo esta decisión, mais isto considérase un mero trámite.

Esta decisión devolve o Obradoiro ao lugar que lle correspondía, 19 anos despois de caer eliminado na liga de ascenso á máxima categoría, fronte ao Júver Murcia, que naquela altura fixo xogar baixo a condición de "español" a un xogador que usou documentos falsos para o propósito. O Tribunal Supremo deulle en 2007 a razón ao equipo que preside José Ángel Docobo e dende entón foron subindo os chanzos necesarios para devolver agora o baloncesto galego á ACB, tres tempadas despois do último paso por esta categoría do Leite Río Breogán.