Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
XORNADA DE DIVULGACIÓN E RECUPERACIÓN

Mudega reivindica o papel do deporte feminino na Coruña

Os xardíns de Méndez Núñez acolleron actividades, que combinaron a práctica deportiva coa lembranza da actividade realizada no pasado polas deportistas da cidade.

Pablo García Martínez - 14:00 15/06/2009

A asociación sen ánimo de lucro Mulleres Deportistas Galegas (Mudega) organizou o pasado domingo na Coruña a I Xornada do Deporte Feminino na Rúa. Durante todo o día, practicáronse nos xardíns de Méndez Núñez deportes coma o judo, taekwondo, ciclismo, baloncesto, rugby ou voleibol. Ademais, realizouse tamén unha exposición fotográfica que lembrou as mulleres deportistas coas que contou a cidade nas últimas décadas. Mudega organizou este evento coa colaboración do Concello da Coruña, exercida mediante as concellarías de Deportes e de Igualdade e Participación.

A vicepresidenta de Mudega e presidenta da Federación de Taekwondo, Mercé Barrientos, valorou de xeito positivo todo o acontecido durante a fin de semana e afirmou que "aínda que vimos algúns aspectos mellorábeis, démonos conta de que este é un modelo interesante que se pode trasladar a calquera cidade galega, servindo ademais de recoñecemento a aquelas pioneiras do deporte feminino, que competiron nunhas épocas difíciles". Barrientos lembrou que o evento foi organizado en moi pouco tempo, e amosouse leda pola "alta asistencia de público e a participación".

Premio ás deportistas destacadas da cidade
A xornada tamén serviu para premiar algunha das deportistas coruñesas que máis destacaron nas últimas décadas. Así, recoñeceuse o traballo da lanzadora Ángeles Barreiro (que aínda conserva o récord estatal de lanzamento de disco acadado no ano 94, en Ferrol), a xogadora de hóckey María do Carme Rubio; a futbolista Lis Rubio; a xogadora de balonmán María Vieites; e a xogadora de baloncesto Ángela Rodríguez Piñón.

Barrientos explicou que se premiaron "mulleres das que tiñamos noticia como deportistas destacadas da súa época", pero este recoñecemento pode servir, segundo lle explicou a Vieiros, como punto de partida para seguir traballando na procura de máis información.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: