Vieiros

Os gandeiros exipcios enfrontáronse este domingo á policía, no Cairo, no medio das protestas contra as medidas que decretan o sacrificios dos porcos de granxa, ante o medo á expansión da gripe A (H1N1), tamén coñecida coma gripe do porco. A medida foi anunciada polo goberno exipcio, a pesar de que aínda non se detectaron casos de contaxio entre humanos no país.

Centos de manifestantes guindaron pedras e botellas contra a policía, que respondeu con gas lacrimóxeno e balas de goma, segundo informou a BBC.

Sacrifico masivo como medida preventiva
As autoridades ordenaron o sacrifico masivo de porcos como medida preventiva, a pesar de que a Organización Mundial da Saúde (OMS) determinou que este tipo de medidas resultaban innecesarias, xa que a carne e os derivados do porco non transmiten o virus. Alén disto, en Exipto só un 10% da poboación, a minoría cristiá, é a que come carne deste animal.