Vieiros

Ante a presenza da mandataria arxentina, Cristina Fernández de Kirchner, nun acto na Casa Rosada de Bos Aires, os presidentes de Bolivia, Evo Morales, e Paraguai, Fernando Lugo, asinaron unha histórica demarcación limítrofe, pendente dende o fin da Guerra do Chaco, hai 74 anos.

"É un día transcendental e histórico para Bolivia e Paraguai", destacou Morales, ao celebrar a fin da diferenza fronteiriza que mantiñan ámbolos dous países dende a guerra que se desenvolveu entre 1932 e 1935, e que deixou máis de 100 mil mortos. Este conflito desencadeárase polo control da rexión do Gran Chaco, na que se supuña debía haber grandes reservas de petróleo. En xuño de 1935, os gobernos de Bolivia e Paraguai acordaron unha tregua, que formalizaron no 38 en Bos Aires, asinando o Tratado de Paz, Amizade e Límites.

"Paraguai e Bolivia teñen un destino de grandeza que hoxe comezamos a compartir. Para que nunca máis na nosa América as apetencias externas nos enfronten, aprendamos a extirpar os receos que danan as nosas relacións", declarou, pola súa parte Lugo. Fernández de Kirchner, polo seu lado, instou a "ter memoria", non para "quedar atrapados", senón "para non volver repetir vellos erros", sinalou.