Vieiros

"Só alguén con mala conciencia e peores intencións pode ter a ousadía de efectuar semellantes afirmacións", analizaba este domingo o voceiro parlamentario do PPdeG, Manuel Ruíz Rivas, ao respecto das afirmacións realizadas polos socialistas sobre a responsabilidade dos gobernos do PP no atraso da alta velocidade ferroviaria en Galiza. Considera Ruíz Rivas que o PSOE "estatal e galego" é o único responsábel da "aldraxe que condena Galiza a converterse na derradeira comunidade autónoma en ter conexión de alta velocidade ferroviaria coa meseta".

Na opinión de Rivas, cinco anos despois de que o PSOE chegase ao poder no goberno español "non é de recibo que o flamante ministro de Fomento trate de responsabilizar dos novos atrasos aos gobernos do PP en Madrid". "É unha mágoa que Zapatero non aproveitara a visita a Galiza para dicir a verdade e admitir que o seu goberno non ten cartos para o AVE galego porque el e o seu equipo pretenden primar a Cataluña no reparto da torta do financiamento", acusou o voceiro do PP.