Vieiros

As autoridades de Turquía e a Armenia acordaron desenvolver un "roteiro" para a normalización das relacións internacionais entre os seus gobernos, cunha serie de discusións mediadas por Suíza, segundo anunciou o Ministerio de Exteriores turco. As negociacións "conducirán a unha comprensión mutua", sinalaron dende Ancara. 

Turquía fechara as súas fronteiras con Armenia en 1993, amosando o seu apoio a Acerbaixán no conflito que este país mantiña cos armenios, por causa do enclave de Nagorno-Karabach, ocupado naquela altura.

Nesta última fase de reaproximación, Acerbaixán parecía ser o maior obstáculo a un compromiso entre turcos e armenios, xa que por causa das súas presións, Turquía non deu os pasos precisos para facer o recoñecemento formal do xenocidio armenio, a masacre acontecida en 1915 baixo o dominio otomano.