Vieiros

"Se non se retomou a negociación é porque o actual presidente da Xunta se negou", subliñaba en xaneiro de 2009 durante a súa visita á redacción de Vieiros o que será vindeiro presidente do Goberno. Ao respecto da negociación para a reforma estatutaria, insistía Núñez Feijoo: "En Montepío quedamos en retomala despois das eleccións municipais de 2007 e logo o señor Touriño dixo que non estaba disposto e como é coñecido botoulle a culpa a Feijoo de todo o que ocorre en Galiza".

Apenas unha semana despois do inicio formal da nova lexislatura e ás portas do debate de investidura e a toma de posesión, abrolla outra vez a posibilidade de que esa reforma saia adiante nos próximos catro anos e co novo equilibrio de poder no Parlamento. A presidenta do Parlamento, Pilar Rojo, comentaba esta fin de semana a súa confianza en que o novo Estatuto poida ver a luz durante o novo treito parlamentario. Diante dos micrófonos da Cadena Ser, Rojo dixo apostar por que esta sexa "a lexislatura do novo Estatuto de Autonomía de Galicia" e prometeu traballar por sacar adiante un pacto "co acordo de todos". "Temos, entre todos, que chegar a un equilibrio, eu creo que niso consiste o debate e o consenso", expresou a nova presidenta da institución.