Vieiros

A Axencia Espacial xaponesa comunicou a intención do Goberno de enviar un robot bípede á Lúa en 2020. Os detalles específicos da misión, incluídos o orzamento e as exixencias tecnolóxicas para o seu cumprimento, serán determinados nos próximos dous anos por un gabinete especial.

O desenvolvemento dun robot bípede lunar é parte dos novos e ambiciosos plans do país asiático que marcarán un novo rumbo na súa política do espazo. Nun segundo paso considerarase a posibilidade da exploración conxunta do satélite da Terra coa participación de robots e humanos.

A axencia xaponesa tamén recomendou a promoción da investigación en satélites militares, especialmente un sistema de alerta para a detección de lanzamentos de mísiles balísticos e tecnoloxía para detectar e analizar as ondas de radio enviadas no espazo.

Os avances de China e especialmente o lanzamento do satélite de Corea do Norte, que as autoridades xaponesas consideran que en realidade foi unha proba de mísiles de longo alcance, están detrás da publicación desta iniciativa.