Vieiros

Igual que aconteceu nos primeiros días, Juan Mourón foi o corredor máis destacado do Xacobeo Galicia no Giro dei Grosseto, e o de Betanzos foi tamén o mellor na clasificación xeral, onde acabou na 24ª posición, a tres minutos do italiano Daniele Pietropolli, que gañou a carreira. Mourón saíu na terceira e última etapa como home mellor clasificado do equipo galego, situado na 17ª posición a só 13 segundos do líder, e malia estar co grupo de cabeza toda a xornada descolgouse na terceira subida cando os ciclistas máis fortes apertaron.

Durante a etapa Mourón exerceu como líder do equipo, polo que tivo o luxo de ter traballando para el a homes como Mosquera, Veloso ou Herrero. O eventual líder do Xacobeo declarouse "contento porque a xente de diante, ademais de ser de primeira liña, está xa moi forte pensando nas clásicas de primavera".

Comezou a Vuelta a Andalucía
Este domingo arrincou a carreira andaluza cunha etapa cronometrada de 7´3 quilómetros pola localidade de Xaén. A vitoria foi para o catalán Xavier Tondo, que marcou un tempo de oito minutos e 31 segundos. David García foi o mellor clasificado do Xacobeo, cedendo só 25 segundos con respecto a Xavier Todo.

O luns dispútase a 2ª etapa sobre un percorrido de 169 quilómetros con lixeiras irregularidades e só dúas subidas de terceira categoría. O terreo é propicio para que algúns corredores que, en principio, non van loitar pola vitoria na xeral procuren o seu protagonismo mediante unha escapada e aquí algúns corredores do Xacobeo poden ter as súas opcións. A outra hipótese é que o grupo chegue unido á meta e a vitoria se decida no sprint final.

• O Xacobeo Galicia, un a un