Vieiros

"Ese é o paso que debemos dar", expresou o líder do BNG ao respecto das inxeccións de cartos no sistema financeiro, chamando a un control público máis estrito sobre as axudas. Nese sentido, aproveitou o voceiro nacional do Bloque para insistir en que nese marco deberan aproveitarse as potencialidades do autogoberno e recordou a proposta dos nacionalistas a prol dun Instituto Galego de Crédito Oficial. Laiouse Anxo Quintana das voces en contra do proxecto, censurándolles que só critican a idea "porque en Madrid non parece ben".

Nesa liña chamou Quintana aos cidadáns a "tomaren as súas propias decisións" e á vez contribuír ao aumento da capacidade de decisión desde Galiza para poder afrontar a crise. "Temos recursos e posibilidades no país para facelo, pero temos que crer en nós mesmos, e esa é a proposta do BNG, crer en Galiza", afirmou.

Durante o mesmo acto político do BNG celebrado na noite do luns en Cambados, o voceiro do BNG insistiu na receita do autogoberno "fronte á crise" e salientou a idea de usar "a autonomía política" como ferramenta para "xerar benestar". "É o momento de dar un paso adiante, porque o crédito non está a chegar ás empresas e ás familias", dixo Quintana, "penso que desde o autogoberno algo podemos facer ao respecto”, indicou, subliñando unha vez máis, que a iniciativa do BNG a prol dunha institución crediticia garantiría que o crédito "chegue á economía produtiva, ás familias e pequenas e medianas empresas".