Vieiros

O vicepresidente de Gazprom, Alexandr Medvedev, denunciou que Ucraína "bloqueou todas as nosas accións para o tránsito de gas", logo de reactivar as subministración este martes pola mañá tal e como se acordara entre as parte en conflito e a UE.

Medvedev asegurou que "non temos posibilidades físicas para efectuar o tránsito do gas polo territorio de Ucraína", á que achacou "toda a responsabilidade", xa que "non abriu o gasoduto" para a súa distribución.
Ademais, acusa o goberno de Kiev de reorientar o seu sistema de transporte para o consumo interno.

Pola súa banda, a compañía estatal ucraína, Naftogaz, denunciou á súa vez que Gazprom avisou no último momento do volume do gas que se propón bombear e a dirección do tránsito, distinta á habitual e que crea problemas para o abastecemento interno.
 
A actitude de Moscova, consideran dende Ucraína, "é unha provocación que busca pór en dúbida o seu prestixio como transportador fiábel" de enerxía.

Dirixentes europeos, rusos e ucraínos emprenderon consultas telefónicas para esclarecer a situación, mentres as exportacións a Europa continúan cortadas por sétimo día consecutivo.

Ademais, a Comisión Europea denunciou que os seus observadores teñen problemas de acceso a varios puntos de Ucraína e Rusia para supervisar o tránsito de gas.