Vieiros

Este mércores presentouse na Dirección Xeral para o Deporte a selección galega de fútbol praia, que debutará fronte a Portugal o vindeiro día 21. O partido comezará ás 13.00 horas no multiusos do Sar, onde ese mesmo día se xogará a final do campionato galego. O equipo estará adestrado por Manuel Jiménez e, segundo as súas propias palabras, contará con "tres ou catro xogadores dos mellores do mundo".

Un destes xogadores é Ramiro Amarelle, que acudiu ao acto en representación dos seus compañeiros. O bergantiñán lembrou o tempo que se leva loitando pola creación da selección de fútbol praia, e non escondeu a súa ilusión con respecto ao partido do día 21.

O estreo da selección coincidirá coa disputa do campionato galego de fútbol praia en pista cuberta. Este torneo xogarase entre os días 19 e 21 de decembro, participando nel un máximo de 48 clubs que serían divididos en 16 grupos de tres equipos cada un.