Vieiros

Un equipo de investigadores asegura que descubriu o alixo de marihuana máis antigo do que se ten constancia, nunha tumba nunha área remota da China. O cannabis ten 2.700 anos de antigüidade e parece que foi cultivado especificamente "con finalidade psicoactiva" e non como alimento ou tecido, segundo se publica no Journal of Experimental Botany.

Son en total 789 gramos de cannabis desecado que se enterraron a carón dun home de raza branca, ollos azuis e cabelo claro, probabelmente un xamán da cultura Gushi, ao noroeste da China. O solo alcalino e a sequidade do terreo permitiron conservar a tumba en perfectas condicións. Mesmo o vexetal conservaba a súa cor verde, malia que xa perdeu o seu característico aroma.

Xa se atoparan restos de cannabis no antigo Exipto, entre outros lugares, e historiadores como o grego Herodoto xa falaran da substancia, pero a atopada na tumba da China é a máis antiga que se puido analizar. O equipo de investigadores, composto principalmente por chineses, fixo todo tipo de probas na marihuana, dende a datación por carbono 14 até unha análise xenética.

Mesmo tentaron facer xermolar cen das sementes atopadas, aínda que non tiveron éxito. A marihuana tiña un contido relativamente alto de THC, o principio activo do cannabis. Non se puido determinar se o produto se consumía fumando ou inxerindo, pois non se atoparon máis pistas na tumba do xamán, que morreu aos 45 anos de idade. O alixo estaba gardado nun cesto de coiro e nun bol de madeira e suponse que estaba destinado ao consumo na outra vida.