Vieiros

Serán 20 millóns de euros este mesmo ano e 80 millóns máis para 2009, segundo o acordo pechado este mércores en Madrid entre goberno español e Xunta. Un reforzo das cantidades destinadas ao financiamento da Lei de Dependencia que, segundo explicou o vicepresidente da Xunta, Anxo Quintana, permitirá que cando remate 2008 sexan 20 mil persoas as que xa reciban as prestacións derivadas da aplicación desta lei e que a cifra poida chegar ás 35 mil en 2009. Así o acordaron a ministra de Educación, Política Social e Deporte, Mercedes Cabrera, e o vicepresidente galego.

Na opinión de Quintana, este compromiso complementa "o grande esforzo realizado pola Xunta para introducir un sistema galego de benestar". O vicepresidente referiuse á necesidade de que en tempo de crise a rede pública de instalacións, servizos e programas para atender a xente maior, dependente ou que sofre calquera tipo de minusvalidez conte de xeito especial coas garantías de financiamento das administracións. Doutra banda, vicepresidencia destaca que o goberno español asuma que o proceso de aplicación da lei presenta unhas "características específicas"en Galizas, que teñen unha "incidencia directa" sobre o custo e a tipoloxía de recursos que conforman catálogo de prestacións ás persoas dependentes.

O PPdeG sinala que se perden 20 millóns
"Volve con menos cartos dos que reclamaba hai dous meses", laiábanse desde o PPdeG ao respecto da xuntanza de Quintana e Cabrera en Madrid. A deputada do PPdeG Marta Rodríguez, afirmou que Vicepresidencia pedía en setembro 100 millóns de euros para cubrir as necesidades de 2009. "Foi a Madrid vestido de lobo feroz e regresa coas orellas baixas e sen diñeiro abondo", reprochoulle a deputada popular ao vicepresidente. O PPdeG entende que Quintana mantivo unha actitude de "submisión política" ante o goberno español, e que isto implicará un "atraso xeneralizado" na introdución das prestacións da lei en Galiza. Desde a Xunta rexeitan a interpretación do PP, e sosteñen que a previsión para a aplicación da lei en 2009 ascendía a 210 millóns, 100 deles a achegar polo Estado. Así, os 20 millóns a recibir antes de fin de ano corresponderíanse coa débeda deste exercicio.