Vieiros

"Que sexan menos laretas e que se poñan a traballar", convidou este luns o conselleiro de Industria aos responsábeis de Red Eléctrica. Fernando Blanco asegurou que nas xuntanzas mantidas cos responsábeis da empresa propietaria das liñas de distribución, púxose de manifesto que é asumíbel que a enerxía dos novos parques eólicos de Galiza entre na rede se se atenden os compromisos estabelecidos. "Equivócanse", insistiu en avaliar o conselleiro ao respecto do cuestionamento que responsábeis de Red Eléctrica fixeron desa posibilidade.

Blanco avisou de que as necesidades e a planificación están "perfectamente estudadas" e cualificou de "imprudencia absoluta" as manifestacións ao respecto da posíbel existencia de problemas. "Como non é froito do descoñecemento, será outra cousa", engadiu o conselleiro sobre as declaracións de responsábeis do ente público ao Faro de Vigo. Non aclarou en todo caso se se refería ás limitacións á potencia eólica instalada que hai xa meses foron obxecto de loita entre a Xunta e o goberno español, co Ministerio de Industria daquela aparentemente pouco disposto a facilitar as aspiracións eólicas do Goberno.