Vieiros

Unhas 700 persoas segundo a Policía local e 2.500 segundo os organizadores pediron este domingo en Ferrol a retirada do expediente aberto ao cabo Jorge Miguel Gago, expedientado pola Armada Española por denunciar supostas neglixencias nun accidente no que morreron dous militares en 2005. Gago foi, ademais, sancionado a semana pasada con dous meses de prisión.

A Plataforma de Apoio ao cabo Gago, integrada por asociacións veciñais, sindicatos e o BNG e EU-IU, partiu ao mediodía do domingo nunha manifestación de protesta do porto de Curuxeiras, dende onde percorreron as rúas ferrolás pedindo a retirada da sanción para o militar. Segundo informou a Europa Press o voceiro da Plataforma de Apoio, Santiago Torrente, durante a protesta tivo lugar un "momento tenso" ao paso da comitiva pola Igrexa do Pilar, onde a Garda Civil celebraba o día da súa patroa.

"Cando pasamos por diante, tiveron que escoitar os nosos berros e os nosos apupos", explicou. O pasado mércores o cabo foi informado sobre o expediente aberto polo exército español por declarar nos medios de comunicación sobre as "neglixencias" dos seus superiores. Os familiares de Gago, que o venres se encadearon durante unha hora en Ferrol como medida de protesta censuran que o documento teña carácter "confidencial", co que Defensa "evítalles mesmo aos familiares coñecer as últimas novidades sobre a posíbel sanción".

O cabo enfróntase a unha sanción de dous meses de arresto en cárcere militar, que podería cumprir en Madrid ou en Rota (Cádiz), por realizar declaracións nos medios de comunicación sobre o sinistro nas que asegurou que os seus superiores actuaron de forma neglixente o día do accidente.

Estado de Gago
Santiago Torrente explicou ademais que Jorge Miguel Gago se atopa "en moi mal estado psicolóxico" tras coñecer a sanción imposta "tras moitos meses de loita". "Está encerrado na súa casa e non sae para nada, pero está informado de todo o que está a pasar", aclarou. Segundo cree Torrente, o traslado a prisión "podería ser inminente", polo que "é posible", dixo, que a Plataforma e a familia se vexan "obrigados" a realizar accións de protesta "de carácter urxente" para evitar o encarceramento do cabo Gago.