Vieiros

Desde hai anos, as diversas asociacións de emigrantes de todo o Estado con presenza na Arxentina, xúntanse para unha gala conxunta onde, entre repichocas e outras herbas, un ecléctico xurado que xunta diplomáticos, políticos e mesmo representación da compañía aérea patrocinadora escollen a "Raíña da Colectividade".

A elixida deste ano foi Marisol López, da Casa de Madrid en Arxentina, declarada "Reina de la Colectividad Española". A pé dela, a 1ª Princesa da Colectividade, María do Carmo Cancela, da Asociación Cultural e Social Santa Comba de Xallas, e a 2ª Princesa da Colectividade, Macarena Vila, da Asociación Fillos do Concello de Carbia – Vila de Cruces.

O evento, organizado pola Federación de Sociedades Españolas de Argentina, celebrouse no Teatro Avenida de Bos Aires. Na rede, e entre unha ampla escolma de imaxes da visita dos políticos de quenda por aquelas terras, poden atopar a galería de imaxes desta festa.