Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
Na chegada a Fuentes de Invierno

Ezequiel Mosquera bica o podio no que foi o seu día nesta 'Vuelta'

O galego descolgou, a cinco quilómetros da  meta a dúas 'figuras' coma Sastre e Valverde. O líder do Xacobeo conseguiu distanciarse de Sastre, e segue cuarto. Contador gañou a etapa.

Redacción - 18:20 14/09/2008
O líder do Xacobeo Galicia, Ezequiel Mosquera

O líder do Xacobeo Galicia, Ezequiel Mosquera

O ciclista líder do Xacobeo Galicia, Ezequiel Mosquera, segue a ser cuarto na clasificación xeral da 'Vuelta a España', a 4.35 do líder, Alberto Contador. Ademais, vai a menos dun minuto de Carlos Sastre, de quen se distanciou hoxe nunha heroica etapa na que atacaba a cinco quilómetros da meta.

Mosquera foi descolgando ciclistas (entre eles Valverde e Sastre) e quedou só con Contador e Leipheimer. Os dous ciclistas do Astana fóronlle á roda todo o tempo, e a pouco da meta arrincaron os dous, cousa que amolou ao director deportivo do Xacobeo Galicia, Álvaro Pino, quen se amosaba, en declaracións á Radio Galega, "anoxado polo comportamento barriobaixeiro" dos corredores do Astana. Para Pino o normal é que despois de irlle á roda a Mosquera arrancara primeiro un e despois outro, e non os dous á vez, despois de facerlle ao de Teo cargar con todo o traballo case até a meta: "un dos dous debería colaborar (...) non pido que lle deixen gañar a etapa, pero que se comporten doutro xeito, porque o rival deles non é Ezequiel, é Sastre".

Tamén Ezequiel pedía unha axuda que non chegou. Foi el quen marcou o ritmo fortemente, cos Astana Contador e Leipheimer pegadiños ás súas costas. E cando lle ía pedir unha contraprestación ao líder da rolda polo seu esforzo, o de Pinto comezou a pedalear, facéndose coa vitoria cunha facilidade pasmosa. "Como un sputnik fronte ao meu motor Perkins", dixo Mosquera.

Por outro lado, os corredores do Xacobeo, David García Dapena e Gustavo César Veloso tamén fixeron unha moi boa etapa, escalando posición, García é vixésimo e Veloso vixésimo sétimo. O equipo ciclista profesional galego é cuarto na clasificación xeral por equipos.

As impresións de 'Zeq'
Ao terminar, Mosquera sinalaba que con esta etapa desquitábase do mal que o pasou o sábado en L'Angliru, onde quedou sen auga e sufriu cambras antes de entrar na meta. Nas súas palabras descríbese o que sentiu "dinlle sen mirar atrás e mesmo soñaba con gañar a etapa, pero os ciclistas de Astana non tiveron piedade e rematáronme ", afirmou, ao tempo que confesaba que o podio "téñoo difícil. Sastre é un grandísimo rival e vexo complicado poder recuperarlle case un minuto na cronoescalada do penúltimo día. De todos os xeitos, heino tentar; as cronoescaladas sempre se me deron moi ben".

Os pactos de Contador e Valverde
Polo seu lado o posuidor do xersei de ouro, o madrileño Alberto Contador revelou que tiña pactada esta etapa con Valverde: "Falamos antes da etapa; a idea era que el quedase co triunfo parcial e eu coa xeral, pero non puido seguir o ritmo de Mosqurera. Eu falei co coche e, ao final, decidimos ir polo triunfo da etapa. Oportunidades así non se poden desaproveitar".


4,5/5 (10 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: