Vieiros

Trátase dun novidoso trebello no ámbito financeiro estatal, que senta as bases tecnolóxicas para o modelado de aplicacións capaces de competir con éxito neste ámbito de negocio. Forecasting organiza as informacións financeiras en tempo real dos principais xornais e analiza o contido a través de técnicas de intelixencia artificial "de filtrado semántico". O sistema é así capaz de atopar os datos máis importantes que potencialmente lle afectarían á evolución dun valor no mercado bolseiro.

Inicialmente, a ferramenta foi deseñada para conxecturar sobre a evolución da cotización de accións no Ibex35 e é aínda un prototipo. Os seus creadores agardan que sirva no futuro para a realización de prognósticos a curto prazo sobre o movemento de accións e que poida ser adaptado ao contexto internacional.

O cerebro atrás da idea é o do María Dolores Corzón Leises, estudante de Enxeñaría Técnica en Informática de Sistemas, quen de feito realiza o seu proxecto fin de carreira baixo o título "Recuperación temática de noticias financeiras e a predición de tendencias a curto prazo en mercados de accións". O traballo foi dirixido polos investigadores Félix Díaz Hemida e Ronald Teijeira Fernández, do Grupo de Sistemas Intelixentes da Universidade de Santiago, onde xa se está a pór en marcha unha nova liña de investigación sobre a cuestión.