Vieiros

Vieiros de meu Perfil


Edición xeral

RSS de Edición xeral
XI Congreso

Do 'Agora Galicia' até 'A Forza de Galicia', o PSdeG cítase por vez primeira en catro anos

Peneirar "tradición galeguista", combinada con socialdemocracia "moderna" é a alquimia que Pérez Touriño di esperar dun congreso "en clave de país".

R.Noguerol - 09:00 26/07/2008

Na calor do verán de 2004 as temperaturas internas do PSdeG xa non chegaban ás cotas de tensión que marcaran non moito antes. O partido desembarcaba naquel momento na cita congresual co obxectivo de conformar un equipo estábel que apelara á "complicidade" social para pilotar o asalto ao cambio de goberno en posición de liderado. O lema elixido daquela: 'Agora Galicia'.

Catro anos polo medio e o éxito da entrada no Goberno co privilexio da presidencia da Xunta, o PSdeG-PSOE escolle 'A forza de Galicia' como lema para este XI Congreso. A meta estratéxica non deixa de ser ambiciosa, cunhas eleccións á volta de poucos meses e a recoñecida aspiración de ampliar forza parlamentaria. Non en van, nas últimas citas coas urnas, os socialistas repetían que a meta de derrubar a hexemonía do PP como partido máis votado estaba ao seu alcance.

O documento marco co que o PSdeG chega a este congreso aspira a obter esa maioría social aproveitando o que definen de "conservadurismo inmobilista dun PP confuso e en crise". Polo que lle toca ao BNG, os socialistas evitan definición ao xeito do que lle adican ao PP, insinuando apenas que o nacionalismo non achega proposta de renovación "seria e fiábel".

A ese escenario o PSdeG pretende deseñar un proxecto "modernizador", para o que, a nivel de contido, definen seis eixos: a economía social de mercado como instrumento para a igualdade e a cohesión social; a modernización económica e social; a igualdade de xénero; o desenvolvemento sostíbel; unha democracia de calidade; e autogoberno e federalismo. Pero máis aló do relativo consenso na construción do discurso, os socialistas enfrontan nesta cita o conflito noutro eido, á hora da elección dos nomes. Ao congreso chégase cun pequeno grupo de delegados abandeirando a crítica ao que consideran un excesivo protagonismo dos "independentes" na conformación das políticas desenvolvidas a través das institucións que gobernan. Máis agochada aínda abrolla outra clave, a do pulso mantido polo touriñismo fronte ao crecentemente poderoso Xosé Blanco.


3.17/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: