Vieiros

Uns 400 habitantes Inupiat de Kivalina, en Alaska, terán que abandonar en pouco tempo e definitivamente a súa aldea, debido a que o aumento das temperaturas está a provocar desxeos, e a súa vez estes dan paso a inundación da localidade costeira.

Mais o cerne da cuestión é por que o termómetro está a alcanzar máximos históricos. Os Inupiat téñeno claro. E o bufete de avogados estadounidense Susman Godfrey tamén.

Hai meses que a firma iniciou unha batalla legal contra vinte compañías petroleiras, eléctricas e gaseiras as que acusa de emitir millóns de toneladas de gases de efecto invernadoiro á atmosfera, provocando o derretemento do xeo do Ártico e causando as consecuentes inundacións.

Entre as empresas están multinacionais tan importantes como ExxonMobil, Chevron e BP. Ademais, oito das corporacións tamén afrontan unha denuncia por "conspiración para enganar a opinión pública" sobre as causas reais do quecemento global.

Calculan que o custe económico da 'mudanza' definitiva dos Inupiar podería ser de entre 100 e 300 millóns de dólares (entre 63 e 189 millóns de euros). Os demandantes exixen ou ben que as compañías corran cos gastos ou ben que paguen a construción dunha barreira mariña que os protexa das crecidas do mar.