Vieiros

No Reino Unido, 800 clientes da compañía de telecomunicacións Virgin Media xa recibiron cartas de aviso de que non deben descargar música mediante redes de intercambio de arquivos, actividade que é ilegal no estado británico. Os avisos forman parte dunha campaña posta en marcha en colaboración coa BPI (industria fonográfica británica).

O organismo que representa os fabricantes de discos do Reino Unido explicoulle á BBC que prevé enviar varios miles de cartas máis nas próximas dez semanas. E non descarta levar perante os tribunais os fornecedores de servizos de internet.

A BPI quere que todas as compañías de comunicacións adopten unha política de "tres golpes", que consiste en avisar dúas veces os usuarios de redes P2P e, á terceira, desconectalos, se comparten arquivos con copyright. De momento, só Virgin Media se sumou á campaña, aínda que quixo deixar claro que a campaña é, polo momento, só "educativa" e que aínda non expulsou ningún usuario da rede. Porén, na carta enviada aos usuarios ameázaos coa desconexión, un "erro", segundo Virgin.