Vieiros

Vieiros de meu Perfil


Fwwwrando

RSS de Fwwwrando
DÉCIMO ANIVERSARIO

Os gañadores dos Galicia de Investigación recolleron os premios en Compostela

Os premiados foron Carlos Pajares, polo estudo da orixe do universo, e os novos investigadores Miguel Ángel Correa, en nanotecnoloxía, e Roberto López, en telecomunicacións.

Redacción - 11:00 28/05/2008
Carlos Pajares

Carlos Pajares

A Consellaría de Innovación e Industria entregou o martes en Compostela os Premios Galicia de Investigación 2007, que fixeron o seu décimo aniversario. Desta volta, os galardóns recaeron nos doutores Carlos Pajares Vales, Miguel Ángel Correa Duarte e Roberto López Valcarce.

O recoñecemento a Carlos Pajares Vales, doutor en Física e catedrático e ex-reitor da Universidade de Santiago, débese ao seu traballo investigador no campo das partículas elementais e ás súas achegas no campo das interaccións partícula-núcleo e materia a alta densidade. Pajares centrou a súa investigación na reprodución experimental da orixe do universo mediante aceleradores.

No seu discurso, Pajares Vales salientou o "recoñecemento a un labor que en moitos aspectos non é un mérito individual senón de moitas persoas". Tamén amosou o seu convencemento de que o xurado tivera en conta a súa "participación na orixe e desenvolvemento da Facultade de Física e en particular da área de Física de Partículas".

Pola súa banda, o premio na categoría de investigador novo concedéuselle ex aequo a Miguel Ángel Correa e a Roberto López Valcarce debido á excelencia demostrada polos dous candidatos, o primeiro na investigación en nanotecnoloxía e o segundo polo seu traballo no campo das telecomunicacións.

Miguel Ángel Correa (1971) centra o seu traballo no campo da nanotecnoloxía, concretamente no desenvolvemento de novos materiais multifuncionais para aplicacións en diferentes sectores. Actualmente é investigador principal do proxecto “Funcionalización de nanotubos de carbono para aplicacións como biosensores e microrreactores”, financiado pola Xunta de Galicia.

Roberto López Valcarce (Ponferrada, 1971) é doutor enxeñeiro de Telecomunicacións da Universidade de Vigo. O seu traballo investigador desenvólvese na área do procesado da sinal, principalmente na súa aplicación ás comunicacións dixitais e na eliminación das distorsións producidas en procesos de transmisión.

O acto contou coa asistencia da conselleira de Educación, Laura Sánchez Piñón; do director xeral de I+D+i, Salustiano Mato; do secretario xeral de Política Científica e Tecnoloxía do Ministerio de Ciencia e Innovación, José Manuel Fernández de Labastida; e dos reitores das universidades de Santiago, Senén Barro; Vigo, Alberto Gago, e A Coruña, Xosé María Barja. Non puido asistir o conselleiro de Innovación e Industira, Fernando Blanco, pola súa comparecencia no Parlamento.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: