Vieiros

Vieiros de meu Perfil


Edición xeral

RSS de Edición xeral
Elección parcial no Reino Unido

Co papo cheo de votos os conservadores agoiran a fin do "novo laborismo"

Os tories avalían que a vitoria nos comicios nunha circunscrición onde sempre perderan, é exemplo da viraxe electoral que os levará ao goberno.

Redacción - 14:25 23/05/2008

Durante trinta anos, a circunscrición de Crewe and Nantwich foi un feudo laborista inaccesíbel ás propostas dos conservadores. Pero na votación deste xoves, paradoxalmente, as urnas ofreceron para Edward Timpson, o candidato do Partido Conservador, o 49,5% dos votos, por diante do 30,5% do Partido Laborista. Estas cifras supoñen unha caída de máis de dezaoito puntos porcentuais para os laboristas e un incremento de dezasete puntos para os conservadores.

"As bases conservadoras desencantadas volveron", asegurou David Cameron, o actual líder da oposición ao goberno laborista de Gordon Brown. Cameron insistiu ademais en varias ocasións en que o acontecido é un dato máis que na súa opinión exemplifica "a fin do Novo Laborismo". O líder torie referíase así ao que considera a desaparición da corrente que hai algo máis de dez anos impulsou a Tony Blair á súa primeira vitoria nas eleccións xerais.

Pola súa banda, o actual primeiro ministro, Gordon Brown, escolleu unha argumentación parecida á realizada hai poucas semanas cando o seu partido sufriu unha significativa perda de apoio nas eleccións municipais. Así, Brown falou de "tempos difíciles para a economía internacional" e opinou que os cidadáns están preocupados polos agoiros do escenario económico a curto prazo. "A xente quere que o goberno se ocupe de ofrecer solucións cando ve como os prezos se disparan", afirmou, asegurando que é un "desafío" que afrontará.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: