Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
VOLTA A ASTURIAS

Rabuñal pasa de terceiro polo Alto do Acebo

O ciclista do KGZ comeza a dar probas das súa forza e das súas posibilidades na etapa raíña da rolda asturiana.

Redacción - 12:05 07/05/2008
Gonzalo Rabuñal na rolda asturiana

Gonzalo Rabuñal na rolda asturiana

O ciclista do Karpin Galicia Gonzalo Rabuñal conseguiu a terceira posición na etapa raíña da Volta a Asturias, dando a primeira mostra seria das súas posibilidades como ciclista no campo profesional.
O equipo galego tamén tivo unha destacada actuación no plano colectivo, conseguindo o segundo posto na etapa, por detrás do LA Aluminios-MSS, gran dominador da carreira.

No inicio da etapa fraguouse unha fuxida de dezasete corredores, que aínda tiñan por diante 180 quilómetros e tres portos do montaña (un de primeira e os dous últimos de categoría especial). Entre os valentes, dous corredores do Karpin Galicia: Gonzalo Rabuñal e Vladimir Isaichev. A fuga chegou a contar cunha vantaxe de nove minutos.Tras o paso pola cima do segundo porto (alto de Connio), o grupo de cabeza quedou reducido a só sete corredores, con Rabuñal entre eles. No terreo previo á ascensión ao Acebo a coordinación no grupo de cabeza comezou a romper e Tomas Marczynski (Flaminia) decidiu facer a guerra pola súa conta. O campión polaco de fondo do 2007 marchou en solitario e conseguiu gañar a etapa.

O resto de perseguidores estableceu tamén unha loita particular, con David de la Fuente (Saunier Duval) e Gonzalo Rabuñal como corredores máis activos, que acabarían segundo e terceiro, respectivamente, na esixente cima do porto asturiano. O ciclista galego deste xeito ascendeu até o sexto posto na xeneral.

O resto do KGZ
O resto de corredores do KGZ seguen loitando en Asturias. De feito, Ezequiel Mosquera foi décimo sexto neste etapa, o que lle outorgou o décimo cuarto posto na xeral; mentres que David García é agora décimo sexto. Por equipos o Karpin Galicia está terceiro na xeral entre dezasete equipos.

Vida e obra de Rabuñal
O corredor de Arteixo comezou a tempada cun accidente de tráfico que lle impediu participar na concentración do equipo e abordar as primeiras carreiras do calendario no estado de forma que se prevía. Mais a partir daquela, segundo contan dende o KGZ, comezou a "mesturar as ganas cas présas e iso permitiulle ofrecer algún escintileo inconexo, pero non a súa verdadeira medida", cousa que aínda está por calibrar, pero que promete, lembrando a súa traxectoria nas categorías inferiores.

Hai que ter en conta que Rabuñal foi un dos cinco corredores dos dezasete que comezaran a escapada que aguantou a suba ao Acebo.

A quinta e última etapa dispútase entre Cangas del Narcea e Oviedo sobre 184 quilómetros.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: