Vieiros

Un exemplo do papel que desempeñan as novas tecnoloxías foi a sorpresiva difusión pola rede dun vídeo no que un mozo, Eliécer Avila, criticou ao presidente da Asemblea Nacional, Ricardo Alarcón, nunha recente reunión a portas pechadas na Universidade de Ciencias Informáticas (UCI).

Ante a repercusión que tivo o vídeo, as autoridades colocaron na versión dixital do diario oficial Granma unha entrevista co estudante, na que aclaraba que as críticas estaban encamiñadas a fortalecer o socialismo, non a eliminalo.

A información completa xamais se difundiu nos diarios impresos e todo quedou no ciberespazo.

Na rede discutiuse de xeito aberto a histórica renuncia de Fidel Castro á presidencia, en febreiro, a elección do seu irmán Raúl para sucedelo e as especulacións sobre o rumbo do seu goberno.

"Raúl necesita agora tempo", escribiu, por exemplo, unha persoa chamada Rogelio Sarforat nun comentario en Kaosenlared. E agregou: "Teñamos confianza, calma e manteñámonos unidos ao redor da Dirección da Revolución".

Alguén lle respondeu desde Miami: "As palabras de Raúl e a constitución do novo Consello de Estado foron un balde de auga fría para os que esperaban que se fixese explícita unha maior vontade de cambio".

Hai de todo, incluídos insultos e palabras subidas de ton nun e outro bando.

Con todo, por agora poucos cubanos teñen acceso a Internet e é probable que esa situación siga así, a pesar de que o goberno acaba de autorizar a venda de computadoras.

"Unha computadora sen Internet é como unha máquina de escribir mellorada e nada máis", expresou Yoani Sánchez, bloguera que administra Generación Y, espazo que acaba de recibir o premio Ortega e Gasset ao xornalismo dixital en España.

En Cuba só poden ter contas de Internet os estranxeiros e algúns académicos e empregados do goberno.