Vieiros

O conselleiro de Presidencia, Xosé Luís Méndez Romeu, non aforrou palabras para describir a Oferta Pública de Emprego para 2008: “Vai ser a maior da historia da Xunta”. O conselleiro explicou as prazas dispoñíbeis logo de asinar coa CIG, CC.OO e UXT o acordo, só o sindicato CSIF non está conforme coa oferta.

Segundo Méndez Romeu, vai haber 1.936 postos para persoal laboral e 1.348 para funcionarios. Dentro deste último cupo, o conselleiro explicou que 1.283 serán para corpos xerais, con 435 prazas para a promoción interna. Porén, Romeu asegura que “a maior parte das prazas están abertas a todas as persoas que queiran acceder á administración, baixo o principio de libre concorrencia”.

Un dos apartados novidosos é que a Xunta crea 433 prazas para aquelas persoas que levan dez ou máis anos cunha vinculación laboral coa administración. Estes empregos ofertaranse exclusivamente mediante un concurso de méritos. O conselleiro subliñou que todos os procesos selectivos rematarán ao longo do vindeiro ano.