Vieiros

Os resultados finais dos comicios nepalís non se coñecerán aínda se cadra nun prazo de cinco ou sete días, froito dun lento proceso de reconto e un complexo sistema electoral. Mestura votacións directas e con métodos proporcionais, e mesmo permite que un candidato se presente en máis dunha circunscrición, malia que finalmente só poida outorgárselle un escano.

Con todo, debúxanse tendencias claras na saída do primeiro treito do reconto cara á asemblea de 601 membros que deberá deseñar a nova constitución para o país. Vaise culminar así un longo proceso que pon fin a unha monarquía de máis de dous séculos que deixa paso a unha "república federal democrática". Así, os ex rebeldes maoístas que acudían aos comicios baixo as siglas do Partido Comunista do Nepal (Maoísta), parecen ir converterse no partido maioritario, superando os rivais do Partido Comunista do Nepal (Marxista-leninista).