Vieiros

O bipartito quere sacar este ano a maior convocatoria de traballo público da lexislatura. Isto é o que se desprende das declaracións que fixo este domingo na Coruña o conselleiro de Presidencia, Administracións Públicas e Xustiza, Xosé Luís Méndez Romeu. Segundo o conselleiro, o seu departamento chegou este sábado a un acordo cos sindicatos para que en 2008 haxa unha oferta pública de emprego “moi importante” tanto para opositores libres como para aquelas persoas que traballan para a administrón e teñen expectativas de promoción interna.

Méndez Romeu afirmou que o acordo cos sindicatos (CIG, CC.OO e UXT) estabelece mecanismos para “resolver o problema de varios colectivos”. O conselleiro referíase con estas palabras ás sentenzas xudiciais que recoñecen relacións laborais de traballadores coa Xunta. Para isto, Romeu sinalou que haberá “un procedemento de acceso ao emprego público e, posteriormente, un concurso de traslados”. Mais o conselleiro tamén aludiu ao “acceso á estabilidade dalgúns colectivos de funcionarios interinos que por diferentes razóns levaban un longo tempo exercendo funcións de xeito precario”.