Vieiros

O compostelán Pedro Nimo, no seu segundo Medio Maratón en sete días ( o primeiro foi en Azkoitia o sábado), conseguiu entrar de cuarto, sendo o mellor clasificado de entre os atletas do Estado que participaban na proba madrileña. O gañador foi o queniano Eric Kibet Kogo.

Nimo competiu en Madrid para preparar o maratón de Róterdam, que se ha desenvolver o domingo que vén.

María Abel, terceira en Barcelona
A atleta lucense participaba na Cursa dels Bombers de Barcelona, e entrou de terceira, por detrás de Marta Domínguez, facendo unha excelente carreira. A proba tamén foi gañada por unha atleta queniana, Eunice Jepkorir.

Elías Domínguez chega ao podio no Vig-Bay
Aínda que se inscribiu en último lugar, o marroquí Yossf El Kalai conseguiu gañar o medio maratón Vig-Bay, que este ano batía a súa mellor marca en canto a participación, con preto de 2.700 atletas na liña de saída, aínda que non chegasen todos á meta.

O que si chegou, e de segundo, foi o vigués Elías Domínguez, que entrou a tres minutos de El Kalai, a pesares de tentar seguilo en todo momento, mais o atleta marroquí saíu lanzado. Con Domínguez correu, en case toda a proba, Daniel Bargiela, atleta de Ponteareas que entrou de terceiro. O mozo deixou hai nada o triatlón para se dedicar de cheo ao atletismo, e nesta carreira demostrou a súa forza.

Lolo Penas gaña en Iurreta
Superando no sprint final aos corredores africanos, o atleta coruñés impuxo o seu ritmo na carreira urbana de Iurreta (Biscaia). De segundo entrou o etíope Alemayeho Bezade, seguido do queniano Ezequiel Kemboi. De sexto entraba o compostelán Jesús de la Fuente, que segue a facer un bo papel nas carreiras internacionais.