Vieiros

Vieiros de meu Perfil


Edición xeral

RSS de Edición xeral
A poucos meses dos Xogos Olímpicos

China condena o disidente Hu Jia a tres anos e medio de prisión

Ademais, perderá os seus dereitos políticos durante un ano.

Redacción - 19:52 03/04/2008
Hu Jia

Hu Jia

O disidente chinés Hu Jia, un dos principais críticos co goberno antes dos Xogos Olímpicos de Beixín, foi condenado esta quinta feira a tres anos e medio de prisión e a un ano de privación dos seus dereitos políticos por subversión, informan as axencias.

"A proba condenatoria foi a publicación de artigos dentro e fóra de China, e aceptar entrevistas coa prensa estranxeira", sinalou un dos seus avogados. Durante o xuízo, o pasado 18 de marzo, o acusado declarouse inocente do cargo de "incitación á subversión", dixo o letrado, que apelará a decisión.

Pola súa banda, o goberno negou que se intensificase a represión contra os críticos antes das Olimpíadas. "Non podemos aceptar esta acusación. China é un país de leis. Todos son iguais ante a lei, non é posíbel deixar de aplicar a lei por mor dos Xogos Olímpicos", declarou a voceira do Ministerio de Exteriores chinés, Jiang Yu.

Segunda condena en dez días
Detido o 27 de decembro, cando xa estaba baixo arresto domiciliario, Hu Jia denunciara en varias ocasións que Beixín non estaba a cumprir cos compromisos a prol dos dereitos humanos que adoptou para lograr a organización das Olimpíadas de 2008.

Esta é a segunda condena de prisión para un opoñente ao goberno chinés en dez días. O 24 de marzo foi condenado a cinco anos de cadea Yang Chunlin, que difundiu unha carta aberta baixo a máxima Queremos dereitos humanos, non os Xogos Olímpicos.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: