Vieiros

Vieiros de meu Perfil


RSS de
Despois de que Rajoy anunciase que segue

Cautela no PPdeG fronte ao incerto futuro do PP

Feijoo avisa de que os populares galegos agardarán a ver as candidaturas presentadas no congreso do partido. O mapa de ruta incluía o posíbel regreso de Rajoy a Galiza.

Redacción - 09:00 12/03/2008

"O PPdeG non é o presidente do partido e por iso imos ver cantas candidaturas se presentan". Así de cauteloso aparecía o presidente do PPdeG, Alberto Núñez Feijoo, despois do comité executivo do PP, onde Mariano Rajoy anunciou a súa intención de tratar de liderar o partido outros catro anos e até as próximas eleccións xerais.

Con todo, Núñez Feijoo subliñou o seu apoio "a título persoal" a Rajoy, pero non garantiu que no seu conxunto o PPdeG vaia asumir unha posición sen fendas en favor de quen foi líder os últimos anos. O máximo representante do PPdeG este martes en Madrid revelou que foron "algúns dos dirixentes presentes" na xuntanza executiva os que lle trasladaron o apoio explícito a Rajoy, e que algúns dos máis importantes "felicitárono" expresamente. Xa que logo, e vista a falta de unanimidade ao respecto da continuidade de Mariano Rajoy, Feijoo non descarta que vaian presentarse outras candidaturas, alén da do propio Rajoy, no congreso adiantado ao mes de xuño.

E será un mapa de rota que lle podería afectar moi directamente ao PPdeG. Así, en primeiro lugar, aos populares galegos corresponderalles a difícil tarefa de tomar posición a nivel interno nun momento especialmente complicado e cunhas eleccións en Galiza no prazo posíbel dun ano. Por outro lado, este martes transcendía ademais que relevantes integrantes da executiva dos populares lle aconsellaban a Rajoy que mantivese o liderado do PP cando menos dous anos, e que en función das perspectivas nesa altura, considerase a opción de volver a Galiza para liderar o asalto do PPdeG á Xunta. Trátase ademais dun plan de ruta que admite que o PPdeG está agora mesmo lonxe de conseguir un triunfo por maioría absoluta que lle garanta o regreso ao poder no país.


2/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: