Vieiros

A Fundación Celta de Vigo e o clube celeste poñen en marcha un terceiro encontro educativo con nenos e nenas de entre 5 e 14 anos, da provincia de Pontevedra, que inclúe un concurso de carteis e un festival de cinema infantil e xuvenil, orientado, segundo contan "a fortalecer o seu compromiso coa protección do contorno natural galego e a reciclaxe".

A Fundación xa presentou a convocatoria nos centros educativos para que os estudantes poidan participar nesta iniciativa deseñando un cartel con temática ambiental, en tamaño A4. Os traballos hanse de entregar antes do 4 de abril nas oficinas do Museo do Celta. O deseño que gañe será o cartel oficial do encontro que han xogar en Balaídos Celta e Real Sociedad, e o seu autor ou autora recibirá tres pases para a grada de Tribuna, para gozar do partido acompañado dos seus pais.

Ciclo de cinema e natureza
Ademais, os venres 11, 18 e 25 de abril nas instalacións deportivas de Río Baixo hase desenvolver (do 18:00 a 21:00 horas) o Festival de Cinema Infantil Coida o planeta amigo, de balde para todos os nenos e nenas dos centros escolares participantes.