Vieiros

Partidazo, pero con todas as letras. Galiza goleou a Uruguai e viña un tanto detrás de outro. Só lles deixaron marcar un gol a catorce minutos de que terminara a segunda parte.

Pana, xogador do Parrulo de Ferrol, luciuse na casa. Un hat trick na primeira parte, seguido dun golazo na segunda. O outros goles, até chegar a seis, marcáronos O. Vivian do Ourense, e Manu, do Autos Lobelle.

O combinado charrúa a penas tivo tempo para moverse ou planear unha xogada sequera. Os galegos eran moi superiores. Xogadas rápidas, calculadas, centros directos, e pés que buscaban o gol.

A estrea non puido ser mellor, e iso notouse nas bancadas. Os seareiros animaban aos seus xogadores, chamábanos polo nome, aplaudíanlles, e coreaban "Galiza, Galiza!" a berros, aínda que o home que falaba pola megafonía se empeñase en dicir "Ga-li-cia!". Non había maneira. Tamén houbo berros pola oficialidade das seleccións nacionais.

A Galiza do futsal ten nivel. E este é o primeiro partido de moitos, dixo Pana ao terminar o encontro.

Alén do deporte...
Terminando a primeira parte houbo que parar o encontro, ao entraren unha ducia de persoas portando unha faixa na pista. Eran do colectivo de traballadores dos centros deportivos da Coruña que reivindicaban o primeiro convenio colectivo para a provincia. Xa se tiñan manifestado antes ás portas do pavillón, convocados, mais comezada a primeira metade, entraron por un lateral á pista parte deles pedindo que a Dirección Xeral para o Deporte medie no conflito.

Ademais, terminado xa o encontro, segundo puido saber Vieiros, houbo un enfrontamento entre a policía española e varios membros do colectivo Siareir@s Galeg@s. Os Siareir@s denunciaron que os axentes estaban a agardar por eles ás portas do pavillón e varios mozos foron golpeados.

• Primeira crónica do partido (22:30 horas): Ambientazo na Malata e xa imos 5-1
• Anteriores: Todo listo para o Galiza-Uruguai