Vieiros

Vieiros de meu Perfil


Edición xeral

RSS de Edición xeral
INTERCAMBIO

China e Irán colaborarán co audiovisual de Cuba e Bolivia

As televisións cubana e chinesa intercambian programas e sinal. Mentres, Irán pretende crear unha canle para toda América Latina dende Bolivia.

Redacción - 12:45 23/02/2008
Logotipos de Cubavisión e da Televisión Central Chinesa

Logotipos de Cubavisión e da Televisión Central Chinesa

O audiovisual racha fronteiras grazas aos acordos de colaboración que xurdiron entre dous países de Latinoamérica e outros dous asiáticos. Por unha banda, as tres canles internacionais da televisión chinesa CCTV ampliaron a súa difusión a Cuba. O proxecto, nado en 2004, levará a programación procedente da China a máis de 45.000 habitacións de hoteis, sedes diplomáticas, centros de saúde e educativos. En contrapartida, Cubavisión Internacional xa se ve en 16 provincias chinesas, con arredor de 21.000 abonados.

Os intercambios entre Cuba e a China estenderanse á distribución de programas de televisión, que inclúen coproducións e ciclos de cine chinés na illa e cubanos no país asiático. O intercambio contará con documentais, telenovelas, programas infantís, musicais e producións sobre ballet, historia e medio ambiente, subtitulados nas respectivas linguas oficiais.

Televisión iraniana
Por outra banda, o presidente de Bolivia, Evo Morales, anunciou que Irán está interesado en crear unha canle de televisión no centro do país, para emitir a todo o territorio boliviano e a América Latina. Morales desvelou a nova durante a clausura do congreso das federacións de cocaleiros do trópico de Cochabamba, unha organización que tamén aspira a crear unha emisora de radio.

O proxecto televisivo iraniano é un paso máis da serie de acordos de cooperación que asinaron Mahmud Ahmadineyad e Evo Morales nos eidos da enerxía, da agricultura e da industria. Os dous estados abriron relacións diplomáticas en setembro de 2007. Dende aquela, o presidente de Irán visitou Bolivia en dúas ocasións, a finais de setembro e no mes de xaneiro de 2008.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: