Vieiros

A última hora desde os Estados Unidos trae noticia de que, despois de tres novos triunfos parciais, Barack Obama superou xa a Hillary Clinton na suma total de delegados a repartírense en cada estado onde se celebran primarias. A estreita vantaxe en favor de Clinton pasa agora a ser un corto pero significativo liderado de Obama, con apenas dúas ducias máis de compromisarios, 1223 fronte a 1198.

Con esta son xa oito vitorias consecutivas de Barack Obama. A tendencia provocou unha nova dimisión no equipo de Hillary Clinton, desta vez a do subdirector de campaña, Mike Henry. A muller do ex presidente estadounidense centra agora as súas esperanzas para recuperar o liderado no estado de Texas, onde se votará o próximo 4 de marzo.