Vieiros

O alcalde de Vigo, Abel Caballero, está a piques de bater marcas en canto a demandas xudiciais. Logo de que o Movemento polos Dereitos Civís denunciase na fiscalía ao rexedor por non permitir o acceso dos veciños a un pleno do PXOM, agora é a Asociación Profesional de Peritos Inmobiliarios de Galicia (APPIG) a que leva a Caballero ao xulgado. O colectivo, que tamén denunciou á responsábel de Urbanismo, Carmela Silva, considera que se cometeu un delito de prevaricación no proceso de tramitación do plan urbanístico.

O presidente da asociación de peritos, Carlos González Armada, considera que os dous cargos políticos “agocharon” informes técnicos nos que se determinaba a necesidade de que o PXOM fose exposto publicamente outra vez, logo dos cambios introducidos para cumprir a orde da Xunta e para incrementar a reserva de chan para vivenda protexida. Abel Caballero non quixo comentar esta denuncia diante dos medios de comunicación.