Vieiros

Vieiros de meu Perfil


Edición xeral

RSS de Edición xeral
Tamén fronte ao matrimonio homosexual

Os bispos aconsellan o voto a prol da "unidade de España" e contra a Educación para a Cidadanía

A Conferencia Episcopal tamén insinúa a súa posición contraria ao diálogo e a negociación como vía para a resolución do conflito en Euskadi.

Redacción - 15:15 31/01/2008

"Se ben é verdade que os católicos poden apoiar partidos diferentes e militar neles, tamén é certo que non todos os programas son igualmente compatíbeis coa fe e as esixencias da vida cristiá, nin son tampouco igualmente próximos e proporcionados aos obxectivos e valores que os cristiáns deben promover na vida pública", sinala a misiva coa que os bispos queren guiar o voto dos católicos cara aos comicios do 9 de marzo.

Durante a presentación do documento, o voceiro da Conferencia Episcopal, Juan Antonio Martínez Camino, reclamou o dereito da Igrexa a "dicir que en España hai leis gravemente inxustas". A carta dos bispos solicita por exemplo que á hora de acudiren ás urnas, os católicos non lle dean o apoio ás formacións políticas que apoien opción distinta á "fundada no matrimonio" evitando introducir "outras formas de unión que contribuirían a desestabilizala, escurecendo o seu carácter peculiar e a súa insubstituíbel función social".

Temor polas fendas da sociedade "pluricentenaria"
Recoñecen ademais a "lexitimidade" das posicións nacionalistas que sen botar man da violencia "pretendan modificar a configuración política da unidade de España" pero chaman ao respecto a recordar as palabras do anterior Papa a "superar tendencias corporativas e os perigos do separatismo cunha actitude honrada de amor ao ben da propia nación" e o ben común "dunha sociedade pluricentenaria".

Noutro apartado, sinalan as "dificultades crecentes para incorporar o estudo libre da relixión católica nos currículos da escola pública, así como o programa da nova materia de carácter obrigatorio denominada Educación para a Cidadanía, que lesiona o dereito dos pais e da escola a formaren os seus fillos de acordo coas súas conviccións relixiosas e morais".

Na web dos bispos poden ler a carta completa: A Conferencia Episcopal Española diante das eleccións xerais de 2008.


1,45/5 (11 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: