Vieiros

"Os feitos son testans, e nos tres últimos anos Galicia recibe un 60% máis do que nos correspondería por aplicación do sistema catalán e un 30% máis que co criterio andaluz", subliñou Emilio Pérez Touriño durante a súa intervención nun almorzo informativo organizado por Europa Press.

O presidente da Xunta defendeu así o investimento estatal en Galiza, falando contra a "pantasma do agravio comparativo", e asegurando que ese investimento supera en 750 millóns de euros a cantidade que recibiría co sistema de financiamento catalán, en función do PIB, e en 450 millóns, se se aplicase o criterio andaluz de investimento por poboación, froito os dous das recentes reformas estatutarias que afrontaron en cadanseu caso.


Por outro lado, Touriño comentou os avances da economía galega para tratar de alcanzar a media estatal e indicou que nese camiño influiu a política do goberno español do PSOE. Argumentou así que o financiamento que logra Galiza do Estado é beneficioso para o país e cualificou de "imprescindíbel" que se manteña "o ritmo investidor do Estado". "Os euros invertidos por habitante están un 30% por enriba da media estatal", agregou.