Vieiros

Preto dun cento de nadadores galegos e galegas pertencentes aos clubes Máster Náutico de Vigo, Carballo, Pons Vetus, Coruña, Lalín, Riveira e o anfitrión Galaico-Sercoysa representarán a Galiza no Campionato Estatal "Open" Máster de Inverno, que se desenvolverá os días 25, 26 e 27 de xaneiro en Pontevedra, no Complexo Deportivo Rías do Sur.

Esta é unha competición por clubes de categoría absoluta, onde participan todos os nadadores con idades a partir dos 25 anos, sendo aberto a deportistas doutros países.

Cada clube está composto por un número indeterminado de compoñentes, convertendo a participación na máis numerosa do calendario estatal (organizado pola Federación Española de Natación, RFEN), chegando até os 934 nadadores (604 homes e 330 mulleres) de 116 clubs, con representantes de Francia, Portugal, ou Polonia, ademais dos corpos técnicos e federativos.