Vieiros

O buscador especializado en blogs Wikio acaba de publicar a súa listaxe dos 20 blogs máis influíntes do mundo. Entre eles está unha bitácora con participación galega, Microsiervos, que ocupa o posto 13. A clasificación está dominada, claramente, por webs estadounidenses, pois só figuran tres blogs europeos.

Se limitamos a clasificación ás 20 bitácoras máis influíntes do continente, Microsiervos sitúase no segundo lugar, xusto por detrás da francesa TechCrunch. Por debaixo atópanse outros catro blogs do Estado Español: Mangas Verdes (6º), Genbeta (7º), Loogic.com (19º) e Error500 (20º).

Microsiervos defínese como un blog persoal máis ou menos 'geek', dedicado a temas como a ciencia, a tecnoloxía, a internet e os trebellos. Un dos seus catro autores, Javier Pedreira, "Wicho", é coruñés.