Vieiros

Coplas para Icía é o novo álbum no que Xabier Díaz saca á luz a a música da aldea con todo coidado para a continuación poñela no mundo. A primeira desas paradas foi Bos Aires, onde o sábado o músico coruñés, acompañado por Pedro Lamas e Suso Iglesias presentaron o seu disco no Teatro da Comedia. As melodías, que mesturan o jazz coa percusión e o acordeón máis tradicional son unha homenaxe á muller que pon título ao disco. Icía, unha “muller coma poza de música que cantaruxaba coa súa voz de auga levada e regaba o lugar enteiro”, pero son sobre todo unha forma de rescatar as músicas do pobo.

As melodías son tomadas do propio arquivo de Xabier Díaz, froito dun traballo de campo e investigación sobre o folclore galego que el mesmo realizou dende 1990 ao longo de dez anos. O artista compaxina a súa faceta como músico e compositor coa de investigador do noso folclore tradicional. Ademais dos seus proxectos en solitario, este coruñés é tamén o cantante titular da compañía Nova Galega de Danza, coa que xa ten realizado os espectáculos Alento (2005) e Engado (2006).

Para a realización destas Coplas para Icía, Díaz rodeouse de dous dos mellores músicos folclóricos de Galiza, como son Pedro Lamas (saxo e gaita) e Suso Iglesias (acordeón). Para este disco, contou ademais coa inestimábel colaboración de Xosé Lois Romero (pandeira), a voz de Guadi Galego, Iván Costa (zanfona) e as pandeireteiras do Grupo Arestora.