Vieiros

Ao redor de 550 soldados australianos, todos en primeira liña de combate, abandonarán Iraq a mediados do vindeiro ano, segundo anunciou este venres o novo primeiro ministro, Kevin Rudd, nunha emisora de radio, aínda que non marcou un calendario máis concreto.

Rudd gañou as eleccións organizadas o pasado sábado en Australia -que conta con 1.500 efectivos despregados na ocupación da zona- coa promesa de levar de volta á casa as tropas destacadas na loita contra a resistencia iraquí.

O anterior goberno de Australia foi un dos máis firmes aliados de EUA na invasión militar de Iraq. O presidente deste país, George Bush, telefonou a Rudd a pasada fin de semana para felicitalo pola vitoria electoral, mais se descoñece se a retirada de tropas foi un dos temas tratados na conversa.

"Habemos ter unha xuntanza co embaixador estadounidense para estabelecer o procedemento apropiado para a saída das nosas forzas", dixo Rudd, que o luns tomará posesión do cargo oficialmente. Ademais, asegurou que as tropas remanentes continuarán a adestrar a policía e ao exército iraquís, mais nun terceiro país fóra do Iraq.