Vieiros

Un Real Decreto redactado polo goberno español permitirá garantir que as emisións das televisións autonómicas públicas se poidan recibir nas provincias veciñas. Deste xeito, as zonas galegofalantes de León, Zamora e Asturias poderían ver de balde a través da televisión dixital terrestre as emisións da Galega.

O borrador xa foi remitido ao Consello Asesor das Telecomunicacións e a Sociedade da Información para que lles dea o seu visto e prace. En principio, contempla a concesión dun múltiplex dixital adicional, onde caberían até catro canles de televisión máis, para as comunidades autónomas, coa característica de que só o poderán empregar operadores públicos.

Cando se aprobe o decreto, rematarase coa situación de alegalidade que lles afectaba ás emisións da televisión galega nas comunidades veciñas, e referendará, ademais, o intercambio das canles das tres comunidades de lingua catalá: Cataluña, Comunidade Valenciana e Illas Baleares, ou o feito de que ETB se poida ver en Navarra. É preciso, en todo caso, un convenio entre os gobernos das dúas comunidades implicadas.