Vieiros

O Goberno presentou no mediodía desta quinta feira un informe no que daba conta das actuacións por el desenvolvidas en canto á protección medioambiental do mar galego, cinco anos após o afundimento do Prestige.

Unha resposta eficaz ante unha desfeita similar
Galiza está dotada, na actualidade, con "máis e mellores medios materiais e con máis persoal cualificado para facer fronte a emerxencias por contaminación mariña", din dende o Goberno.

Segundo o informe, presentado esta quinta feira na Casa do Concello de Muxía, onde se desenvolveu a xuntanza semanal da Xunta, Galiza ten avanzado en tres niveis na loita contra a contaminación do mar: o xurídico, o de planificación de emerxencia e o de dotación de medios para a prevención e para a loita contra a contaminación.

En canto ao xurídico, déronse pasos importantes a través da aprobación de normas estatais e estáselle a dar pulo á aprobación de normas comunitarias e internacionais que procuran o incremento da seguridade marítima.

No eido da planificación da emerxencia, na actualidade existen dous instrumentos fundamentais para dar resposta a unha posible emerxencia causada pola contaminación mariña: o Plan Nacional de Salvamento Marítimo 2006-2009 e o Plan Territorial de Continxencias por Contaminación Mariña.

Máis medios técnicos e humanos
Polo que respecta aos medios propios da Xunta, houbo unha mellora cuantitativa e cualitativa.

O Servizo de Gardacostas de Galiza foi dotado dunha base loxística de loita contra a contaminación con base no porto de Tragove (Cambados), e tamén dispón de dous buques (o buque remolcador Sebastián de Ocampo e o buque de apoio Irmáns García Nodal). A dotación complétase con 21 embarcacións menores, e, como medios aéreos, dous helicópteros, ademais de numerosos medios terrestres.

En decembro de 2006 incorporouse á flota de Salvamento Marítimo o buque polivalente Don Inda con base en Corcubión, que permitiu multiplicar por trinta a capacidade recollida de residuos deste organismo, pasando dos 80 metros cúbicos de 2004 ata 2.403,8 a finais de 2006. Parelamente, en febreiro de 2007 incorporouse tamén a aeronave Rosalía de Castro, con base en Santiago, para a realización de labores de vixilancia marítima.

Segundo a Xunta, ao finalizar o Plan, no ano 2009, a zona de actuación de Salvamento Marítimo disporá de 9 novas embarcacións rápidas, 2 remolcadores propios, 1 base estratéxica de 18 mil metros cadrados, unha base permanente de actuación subacuática e un helicóptero de salvamento. Por último, está previsto que a capacidade de recollida de residuos no mar de Salvamento Marítimo chegue ao final do Plan aos 7.300 metros cúbicos no seu conxunto.

Inspección do Prestige e tratamento dos residuos
O informe avaliado na quinta feira no Consello da Xunta tamén dá conta da inspección que se fixo no lugar onde se atopan os restos do Prestige o pasado mes de setembro. Segundo os expertos que participaron nesta operación, a cantidade de fuel que saía dos restos era "irrelevante", porén, ordenóuselle á empresa responsábel que procedese a unha operación de selado dos puntos nos que se producía a fuga.