Vieiros

Reflexionou o vicepresidente que aqueles días de novembro de 2002 abrollou unha "nova Galiza" que conseguiría rachar os tópicos de país "pasivo e desmobilizado". Un país que, segundo relatou Quintana, negou a visión "interesada e non real que se quixera impoñer historicamente de Galiza".

"Se algo cambiou no país dende hai cinco anos é a unanimidade dos galegos para expresar a súa responsabilidade cara á súa terra e o seu futuro", indicou durante a súa intervención no acto de homenaxe aos voluntarios que se achegaron ás costas a limpar o chapapote.

Na liña dese discurso, o vicepresidente explicou que con esa mesma inercia do "novo país" que quere incrementar os seus recursos, Galiza aspira a ter voz aló onde se toman "decisións determinantes para o futuro, para a protección da súa costa e dos seus mares". "A nova Galiza soubo converter a indignación en dignidade, a catástrofe nun desafío para medir as capacidades da súa sociedade, soubo cubrir o baleiro dos círculos de poder con responsabilidade", insistiu.

Recordou así Quintana o "esforzo, solidariedade e entrega" de veciños, xente do mar e milleiros de voluntarios que aqueles días se comprometeron en defensa do mar. Lembrou ademais o esforzo organizado arredor da plataforma Nunca Máis en protesta pola situación. Resumiu Anxo Quintana que "a maior catástrofe ecolóxica da historia de Galiza" servira xa que logo para "valorar a valentía dos galegos á hora de afrontaren os seus problemas".