Vieiros

O presidente colombiano, Álvaro Uribe, mantivera durante a campaña unha belixerante posición contra o candidato do Polo Democrático Alternativo, PDA, para a capital do país, Bogotá. O ex senador Samuel Moreno Rojas, competía nesta cidade por manter para a esquerda a importante vitoria, a primeira da historia na capital, conseguida hai catro anos, daquela co dirixente sindical Luis Eduardo Garzón como cabeza de cartel.

Finalmente, Moreno gañou estes comicios con máis do 42% dos votos. Uribe insinuara nos últimos días que o PDA estaba apoiado polas Forzas Armadas Revolucionarias de Colombia, as FARC, acusacións rexeitadas polo partido. A Constitución de Colombia prohibe explicitamente que o presidente do país tome partido directo nos comicios a prol de calquera candidato, esixencia que Álvaro Uribe burlou estes días lanzando as súas acusacións sen citar directamente a candidatos ou partidos malia que o electorado podía percibir claramente quen era o obxecto das súas críticas.