Vieiros

O voceiro parlamentario do BNG, Carlos Aymerich, dixo ter a esperanza de que a reforma lexislativa para o regulamento da Compañía da Radio e a Televisión de Galiza sirva para "rematar coa herdanza do fraguismo que aínda se vive no ente". Aymerich amosou a súa sorpresa e satisfacción polo avance, non incluído no guieiro do discurso entregado previamente a deputados e medios de comunicación. Un anuncio que chega no ecuador da lexislatura e malia que Touriño se comprometera a afrontar esa reforma no primeiro ano de goberno.

Aymerich cualificou de "equilibrado" o discurso do presidente e subliñou tamén a aposta por "manter un desenvolvemento económico que conxugue a sustentabilidade e a cohesión social, sobre todo nun contexto en que a crise inmobiliaria está a se contaxiar ao mercado galego".