Vieiros

"Semella que o discurso estea feito por xente que non vive aquí", comentou o presidente do PPdeG, Alberte Núñez Feijoo, ao respecto da intervención do presidente da Xunta na apertura do Debate sobre o Estado da Autonomía, criticando especialmente a referencia de Touriño á "Liga das Estrelas" onde o líder do executivo considera que xa está Galiza desde o punto de vista económico. "Creo que é pouco respectuoso cos cidadáns", opinou Feijoo sobre a devandita expresión.

Na opinión do líder do PPdeG, o discurso de Emilio Pérez Touriño "pareceu máis un discurso de investidura que un de terceiro ano de goberno". Feijoo avaliou que o presidente fixo "un relatorio de incumprimentos e tarefas pendentes". Ademais, denunciou que das palabras de Touriño se entenda que os obxectivos en materia de enerxía eólica se adiarían até dous anos, os relacionados co gasoducto até tres anos de atraso, e diversas infraestruturas quedarían sen prazo concreto fixado.

De paso, Feijoo reprochoulle a Touriño que non concedese asomo de autocrítica. "Perdeu a oportunidade de ser un chisco humilde", dixo, "acaso non hai erros nin nada que mellorar?". Por outro lado, o presidente do PPdeG tamén instou ao vicepresidente da Xunta, Anxo Quintana, a non intervir na sesión da tarde, asegurando que nese caso "non estaríamos nun Debate sobre o Estado da Autonomía, senón fronte a un dobre discurso onde falan dous presidentes de dous gobernos".